Mientres los del aduar anden perihí sopelexando'l so thimos acerca de l'afondamientu de la democracia y otros discursos follecos, los partíos yá aposentaos, cola ayuda los menores, pero tamién aposentaos, ponen falcatrúes pa que los non aposentaos y pequeños nun se puedan presentar a les elecciones. Asina, nestes, pela primera vegada na hestoria la democracia, pa concurrir a les elecciones xenerales hai que conseguir les firmes del 0,1% de los electores de cada circunscripción onde se presenten.
Si a esa dificultá, grande, añaden que llueu les xuntes electorales anulen les firmes y les candidatures col principiu asturianu de "al gochu gordu, unta-y el rau" (y al gorín, matalu de fame), ehí tenemos un elementu más de discriminación y una forma más de capar la pluralidá y la llegada a la sociedá d'otres idees, otres formes de tar na política y la representación d'otros intereses.
¿Sintieren ustedes esmolecese nin siquier un rispiu a los del aduar por ello? Nin vierbu, ¿non? A ellos abónda-yos con predicar el discursu d'IU de la circunscripción única. ¡Qué casualidá! Unos saben lo que dicen y los demás esberrellen detrás como oveyines.
Nel pinchu que-yos doi a continuación tiene vustedes tolos datos de la cuestión, incluides unes protestes -más bien confuses- d'IU y UPyD: Un "olvido" de Llamazares y Rosa Díez torpedea a los partidos más pequeños (El Confidencial del 14/10/2011)
No hay comentarios:
Publicar un comentario