Norabona a tolos premiaos y gracias l'Arribada pol so continuu trabayu bien fechu.
ACTU D'ENTREGA DE LOS PREMIOS TIMÓN 2015
12:30
Patiu del Centru de Cultura Antiguu Institutu de Gijón/Xixón
Organiza Asociación Cultural L'Arribada
L'iniciu de la décima edición de la Vagamar allúgase esti añu nel domingu 2 d’agostu, cola cellebración del actu d'entrega de los Premios Timón 2015. L’actu entamará a les 12:30 nel patiu del Centru de Cultura Antiguu Institutu.
L’Asociación Cultural L’Arribada vien convocando añalmente unos premios col envís de facer reconocimientu a una trayectoria lliteraria. Son el Premiu Timón, p’autores en llingua asturiana y n’eonaviego, y el Premio Timón, p’autores asturianos en llingua castellana. Dende 2013 tamién se convoca’l Premiu Timón de Cultura Asturiana destináu a asociaciones, sociedaes, fundaciones y otres entidaes que tengan como fin la conservación y promoción de la identidá cultural de nueso.
Los gallardonaos de 2015 son Esther Prieto (IX Premiu Timón pa escritores n’asturianu y eonaviego), Francisco García Pérez (VI Premio Timón pa escritores asturianos en castellanu) y l’Asociación pola recuperación de los Sidros y les Comedies “El Cencerru” de Valdesoto (III Premiu Timón de Cultura Asturiana).
Los gallardones de los Premios Timón son obres del escultor y ceramista xixonés Jesus Castañón.
El IX Premiu Timón va entregalu Ana Montserrat López, conceyala delegada d'Educación y Cultura del Ayuntamientu de Xixón; la entrega del VI Premio Timón va facela Humberto Gonzali, coordinador de L'Arribada; y la correspondiente al III Premiu Timón de Cultura Asturiana correrá al cargu de Xosé Nel Riesgo, director de la FMCEyUP de Xixón.
L'actor Félix Corcuera conducirá l'actu, que va tar musicalmente amenizáu pol grupu Taranus.
Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014).
El Premio Timón foi llográu anteriormente por Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013) y Carmen Ruiz-Tilve (2014).
El Premiu Timón de Cultura Asturiana consiguiéronlu n'otres Ediciones l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).
No hay comentarios:
Publicar un comentario