Constitución de l'Academia: una anécdota

Yeren más o menos les cuatro y picu d'una tarde gris, parezme recordar. Nel antigu salón de plenos de la Diputación, los parlamentarios del Ente Preautonómicu teníamos nel orde del día la constitución de l'Academia.

Nin Rafael Fernández nin el PSOE (y menos la UCD y AP) yeren mui partidarios d'ella. Primero por razones comunes a la visión del mundu de tantos asturianos y, en segundu llugar, porque taben roceanos d'introducir más factores de "división" n'España: motivos de centralismu y "prudencia" (que taba afalada, además, pol momentu delicáu de la transición).

Per otra parte, Rafael Fernández tampoco yera mui amigu de la presión contra les instituciones.

Con que neses tamos y alvierto na sala ciertu nerviosismu, y faenme llegar la noticia de que, al pie l'edificiu la antigua Diputación, na calle Fruela había una manifestación p'apoyar la constitución de l'Academia. Asomo a un balcón de la primer planta y nun veo ellí más que, a tolo más, una docena persones (como supe dempués convocaes por García Arias) con una pancartuca. Recuerdo güei, d'ente elles, a Solís Santos, Lluis Xabel García Arias, Xesús Cañedo (a lo meyor dalgún más de los ellí presentes que nun recuerdo o de los que tengo duldes arreya'l so nome).

Inmediatamente pienso: "Si ven que l'apoyu pa l'Academia ye esti, nun queriéndola nadie, como nun la quier, acábase equí l'Academia".

Asina que baxo esñaláu pregúnto-yos qu'a quién se-y ocurre atropar unes tan exigües "mases obreres y campesines" pa presionar y convénzolos pa que esapaezan enantes de que los (nos) cuenten, y asina lo faen.

¿Tuviere dío p'alantre l'Academia igual, a pesar d'aquel ridículu y d'aquella probetayísima manifestación de fuerza y d'interés popular? Pues a lo meyor sí. O non. Nun lo sé. Pretestu y motivu diose pa que, vista la "clara demanda" -que diría'l difuntu Sergio Marqués-, nun hubiere nada de nada.

En tou casu equí esta'l fechu.

Les consideraciones sobre la visión de la realidá del asturianismu, y otres, yá les fará'l llector.

Ehí, a la derecha la semeya, taba'l pueblu en conceyu reivindicativu