Recibo un prestosín llibru, Parva materia, de Carlos X. Ardavín Trabanco, profesor de lliteratura española na Universidad de Trinity, San Antonio, Tejas. Ente la so abondosa producción d'estudios lliterarios y de creación apaecen a vegaes trabayos o creaciones relacionaes con Asturies.
Parva materia ta compuestu por dos faces, una primera en versu, esto ye, poesía; una segunda, en prosa. La primer parte, la poesía, tien como exe central emotivu'l recuerdu de la madre muerta y la memoria de lo qu'ella fue: nun solo la so persona y el recuerdu la so persona, sinón tamién el recuerdu/conocencia del mundu qu'ella arrastraba detrás. "Diario de una ausencia / Diariu d'una ausencia" ye'l títulu d'esta primera parte del llibru.
"Las ruinas de mi inteligencia", la segunda parte'l llibru, ye un cuadernín onde se xunten les notes de la llectura, del paisaxe, de la observación de les persones, de la reflexón sobre la vida.
La cuciedá del güeyu y la intelixencia, la fondura la observación faen d'esta segunda parte una llectura entretenida y interesante, onde nun falten les notes llíriques.
De la primer parte, bona y resonantemente emocional poesía, nun vo decir nada. Vo trescribir únicamente un de los testos:
no existe el alma,
ni el espíritu que invoco en la noche
sólo existe esta nada que me atenaza
y que a veces me impide pronunciar tu nombre
madre
nun esiste l'alma,
nin l'espíritu qu'invoco na nueche
namás esiste esta nada que m'apodera
y qu'alcuando nun me dexa prenunciar el to nome:
madre
No hay comentarios:
Publicar un comentario