CARTA ABIERTA A DON GENARO ALONSO MEGIDO
Estimáu:
Mándesme una invitación pa qu’asista a un actu onde l’Alministración pretende
homenaxear a los xubilaos docentes de los dos caberos años. Nun voi tar, y que
conste que me da rabia polo que supón de descortesía pa la to persona, pero nun
puedo aceptar un reconocimientu d’una Alministración que vien trabayando
contra’l profesoráu, y en daqué medida contra la enseñanza, dende fai décades.
Nun solo vosotros, l’Estáu en xeneral.
Dende
fai munchu tiempu quienes xestionen la enseñanza vienen actuando dientro los
parámetros que definen tres premises, implícites o esplicites: la desconfianza
hacia’l profesoráu y el so correlatu de que se debe defender al discente de les
inxusticies o maníes del docente; el desconocimientu (espero que voluntariu) de
lo que ye una clase; la voluntá práctica de que, sean los que sean los
conocimientos, l’actitú o l’esfuerzu de caún, tolos alumnos deberíen aprobar
(promocionar).
Un
exemplu de la primera d’eses premises ye’l primer reglamentu de derechos y
deberes de los alumnos que redactó la Conseyería Asturiana, onde la primer
sanción yera una “alvertencia d’alvertencia” y, sobre too, onde’l profesor taba
obligáu a tener un caréu col alumnu en casu de denunciar un comportamiento
perturbador d’esti en clase, y, como si fuesen iguales y fuese aquello un
xuiciu, el profesor debía demostrar con testigos que lo qu’ocurriera nel aula
yera talo como él decía. Otru: la progresiva y estúpida burocratización de la
enseñanza, obligando a reuniones y más reuniones colectives onde se repite lo
mismo en caúna (un magníficu exemplu de cómo son esos rituales pue vese nel
artículu de Francisco García en LA NUEVA ESPAÑA del 16/03/16, “Bingo profesoral”)
a propósitu d’evidencies sobre les que nada hai que decir o sobre les que nada
se pue facer; rituales que nun tienen otru resultáu prácticu que presionar pa
qu’al final de cursu suba’l númeru d’aprobaos.
Dende
fai décades tamién, los sucesivos gobiernos y servicios d’inspección vienen asinamesmo
llexislando y pretendiendo regular día a día y hora a hora lo que se tien que
decir o facer en cada clase a través de les programaciones. Ello con
desconocimientu de lo que ye una clase. Dicho en breve, una clase ye una
actividá que se desarrolla como un trabayu productivu nun aula d’un cursu y
que, a la hora siguiente, na puerta del delláu, n’otru grupu del mismu cursu,
malapenes se ye p’avanzar nin cumplir los oxetivos. Y eso, munches veces, a lo
llargu de tou un cursu escolar, como persabe cualquiera qu’entre nun aula y
pretenda enseñar, esto ye, que los rapazos deprendan.
Dixe
que toles alministraciones actúen igual. Nun ye verdá, de toles
alministraciones de que tengo noticia, la nuestra, la tuya, comportóse peor, pa
poco o pa muncho, colos profesores. Por exemplu, equí nun s’aplicaren les
reducciones d’horariu con sustitución pa los profesores de cierta edá
—prefirióse dir empobinándolos a la xubilación, nuna muestra más de
desconfianza hacia’l colectivu “d’antiguos”—. Si la LOMCE marca un puntu más
d’atorniellamientu de los enseñantes, el vuestru concretu “inventu” de los
indicadores de llogru, supera en munchu a les ideaciones d’otres comunidades,
y, prácticamente, desixe atender más a los papeles qu’a la instrucción del
escolín. Déxame decite un par d’elles más: la primera, la más increíblemente
soportada por profesores y sindicatos: la obligatoria hora del recréu —la del
bocadiellu n’otros trabayos— nun cuenta como parte la xornada llaboral, de mou
y manera que cada profesor, lo que nun pasa en ninguna profesión, aporta media
hora gratuita diaria a la causa de la enseñanza patria. Y, finalmente, a los
profesores (al igual que los mélicos) que cumplíamos 65 años nel 2014 0 2015
decidisteis echanos rompiendo asina les espectatives que pudiéremos tener de
seguir hasta los setenta. ¿Les razones? La principal, sustituir la mano d’obra
más cara por otra más barata, como en cualquier empresa capitalista; la
segunda, esa idea permanente del “rexuvenecer” les plantilles, esa oscura y
permanente inquina y rocea contra la madurez, que tenéis como “antigualla”.
¿Tengo
yo razón? Nun se m’escapa que lo mismo que munchos discreparán de lo qu’equí
digo otros munchos non. Pero creo qu’hai una preba definitiva de lo que yo
digo: la gran cantidá de profesores que tán naguando pola xubilación y que nun
suspiren por otra cosa (hailos que van apuntando los díes que falten, como los
presos); l’altísimu númeru de profesores que, en cuantes cumplen la edá y
condiciones de la xubilación anticipada, nun esperen un segundu más y salen
corriendo. Creo qu’eso dizlo too.
Son
eses dalgunes de les razones que me faen ser descortés contigo nun diendo a esi
“homenaxe” que facéis a los xubilaos de la enseñanza: nada personal, solo
institucional.
Con
too y con ello, deséote de corazón los mayores éxitos neses materies onde
l’éxitu ye tan difícil o, acasu, casi imposible: la meyora de la enseñanza y la
normalización social y escolar del asturianu (pa eso, yá vos dexé, va pa
diecisiete años, un instrumentu afayaízu, la Llei d’Usu y Promoción, que ta por
cumplir: ¡aprovechailo!).
Suerte, pa too
ello, que va sete tan necesaria o más que’l saber y la voluntá.
