Agora paez que por fin, arrepentíos quiciabis poles feches -y, a lo meyor, pola bronca'l confesor-, los de Facienda van devolver el dineru que nos arrobaren na paga de Navidá nun pagada a les "clases pasives del Estáu" (funcionarios de carrera de l'Administración Civil y Militar del Estáu, incluyíos los trabayadores de Xusticia y los Cuerpos y Fuerces de Seguridá y Cortes Xenerales, además de cargos públicos como los presidentes del Gobiernu y los ministros).
O, a lo meyor, nun fue'l cura'l que los arreprendió, sinón la muyer de dalgún, yá que como hai ministros ente los afectaos, fue, quiciabis, la muyer de dalgún d'ellos la que-yos lo echó en cara. Porque la verdá ye que quitar a ún les perres de la cotización pola paga que nun cobra, ¡Hai que tenela de fierru (la cara, claro)!.
¿Puede ser tanta incompetencia? Puede ser. Nun tienen más que buscar equí, nesti blog, na etiqueta "acéfalos llexislantes" y verán cómo eso de llexislar ensin saber de lo que se llexisla faise tolos díes.
Pero, en tou casu, la cosa nun ye solo incompetencia. Dende fai cuatro meses veníen anunciando que yera bono pa los funcionarios cotizar por esta paga de Ñavidá que nun cobraben, y xustificábenlo diciendo que asina "nun perdíen derechos na xubilación".
Munches debieren ser les voces y los espatuxos cuando agora dan marcha atrás y anuncien que nos prósimos tres meses van devolver les perres de la exacción, del "atracu". ¿CON INTERESES, SEÑOR MONTORO?
Y pa que terminen de ver la burlla de too esto, piensen que munchos funcionarios que yá superaren los 35 años de cotización (máximu d'años polos que se paga pensión a les "clases pasives") siguen pagando tolos meses unos 150 euros mensuales ¡PA LA PENSIÓN!, cada mes y pa mayor inri, tamién nesta paga de Ñavidá que nun se cobró.
No hay comentarios:
Publicar un comentario