IU acaba de proponer que se prohiban dos carriles d'El Muru de Xixón pal tráficu "priváu". De los dos que s'eliminaríen, ún sería pa autobuses, tasis y vehículos llétricos; l'otru pa carril bici.
Dende fai tiempu la política de munchos partíos y políticos nun ye más qu'una política de señoritos, que piensen que naide trabaya y que les ciudaes nun son pa trabayar, porque, como ellos nun lo faen, creen que los demás tampoco.
A propósito, Xixón, non agora con Foro, sinón de siempre, con PSOE y IU, ye la ciudá onde peor se trata a la xente que tien que trabayar col coche, comerciales, reparadores, repartidores, etc. Porque, pa esos partíos de señoritos, tol que trabaya y nun ta nes empreses onde los sos sindicatos afilien ye un capitalista y un facha, o, polo menos, nun merez consideración.
Señalemos, per otru llau, una cosa más: Xixón ye una ciudá con escasísimes víes d'un migayín de capacidá viaria, especialmente pa andales de este a oeste, y viceversa: nun hai más, por exemplu, que pensar en cómo anda'l tráficu pela carretera La Costa, otru desaguisáu "progre", esta vegada, de Tini alcalde.
Por cierto, ¿podría decinos l'Ayuntamientu cuántes persones usen diariamente los carriles bicis? A que, si lo saben, nun s'atreven. Porque, iviernu o veranu, nun circula prácticamente naide per ellos a ninguna hora del día.
¡Pero eso qué importa! La política ye l'arte de soñar fataes y caxigalines y poneles en práctica a costa del dineru de los ciudadanos pa conseguir l'aplausu de cuatro amigos, de to madre y la renovación nes prósimes llistes electorales.
No hay comentarios:
Publicar un comentario