Como se sabe, los procesos d'escritura tán arreyaos munches vegaes a ritmos corporales, zunes, vezos sociales, etc.: xente que necesita escribir con roídu, xente que nesesita acorripiase nuna ñube de silenciu; los que tienen que tener delantre dellos oxetos o practicar dellos rituales, etc. Los testimonios son pervariaos dende'l Romanticismu p'acá. Nel clásicu, claru y valiosu Teoría literaria de Wellek y Warren podemos atopar exemplos d'eses zunes y vezos. Casu particular, el de los qu'arreyaben la productividá creativa a l'alcohol, l'opiu o otres drogues, como Coleridge o De Quincey, o los que la enxareyaben colos estaos de concencia alteriada, como munchos de los surrealistes. Honoré de Balzac, por exemplu, escribía con hábitu de monxu, colo que podíamos decir que l'hábitu nun fai al monxu, pero sí al escritor.
Nel presente más de recién tenemos los testimonios de tantos contemporáneos a los que-yos costó pasar de la pluma o el boli a la maquina o l'ordenador, y, de fai mui pocu, a los que nun-yos fue fácil pasar de la máquina al ordenador.
A mí, en concretu, qu'emplego l'ordenador desayaqué, costárenme los dos pasos pa la creación lliteraria, y tuvo que pasar un tiempu pa que consiguiere desarreyar el ritmu d'escribir col boli o la pluma y el so raspiar nel papel del de la escritura lliteraria, y el ritmu y el roídu de la máquina d'escribir del d'escribir ficción, especialmente nel casu de la escritura rítmica, del versu, llibre o non.
Agora, Mason Currey recopila en Rituales cotidianos les zunes y vezos de más de cien artistes, ente los que destaquen autores como Scott Fitzgerald, Truman Capote, Philip Roth o Alice Munro. Pueden ver un ñiciu del llibru en Zunes d'escritores y d'escritura
No hay comentarios:
Publicar un comentario