Asina titulaba Ortega un ensayu sobre Azorín, un escritor de lo menudo, al qu'el filósofu aponderaba precisamente por eso, por sacar, diríemos nós, oru de les coses corrientes y molientes.
Pues podía decise lo mismo de la novela de García Rivas: una gran parte del encantu de les sos páxines ye'l de la descripción -precisa y preciosa, pero non cafiante- del mundu y los oxetos de finales del XIX y el primer terciu del XX: los texíos, les teles, les normes pa baillar o cortexar, los recursos materiales y les producciones de la casa y la quintana, el paisaxe desoláu de Marruecos y del Sahara, les arabíes del sacerdote pa dicir misa... Descripciones que, especialmente a los que tuvimos una referencia llonxana d'aquel mundu y de los sos restos (que duraren hasta los años 70 del sieglu pasáu) afálennos reconocencia y señardá. Pero evidentemente nun fai falta tener aquellos recuerdos pa facer una llectura prestosa d'esos paisaxes.
Per otru llau tán los ambientes y paisaxes onde se mueven los personaxes: Galicia y Asturies, na rodiada del Eo (Ribadeo y Vegadeo, principalmente), Marruecos (el Rif), Cuba, EEUU; toos ellos, en daqué midida, en contraste col pequeñu Villaodrid, la cuna de los principales personaxes y conflictos.
El plantel de personaxes ye ampliu y variáu, bien construidu: Inés, Francisca,
Clara, Clementina, Sindo, Pedro, Amancio, Honoria, Catalina
Basanta, Mauro, Carmen, doña Catalina, Amanda, Samuel, Galuá, Gervasio, Cayetano... y tán toos al serviciu d'una trama complexa d'amores, relaciones personales y distinciones de clase social (con especial atención al esfuerzu de los probes por salir de la miseria, pero tamién de los ricos de salir de les miseries prexuicioses del so "deber social), onde, al mismu tiempu, tán representaos los intereses y la diversa forma de pensar y proceder del cleru.
Y de fondu de too ello, como un símbolu del pasu del tiempu y del camudamientu los tiempos, del esposigue y la decadencia d´actividaes y personaxes, la presencia permanente, como un símbolu, del ferrocarril mineru Villaodrid-Ribadeo, al que, nun momentu de la novela, entama a desurdi-y, al través de los enfotos y esperances de los personaxes, la competencia de la modernidá, l'autobús como mediu de tresporte de persones, y la nacencia del ALSA.
No hay comentarios:
Publicar un comentario