Un regalu por ser el Día d'Asturies

Esti poema, recién sacáu del fornu.

     Como’l gatu cuando lleva al so amu’l zalegu del ratu

                y-y lu pon a los pies, buscando’l so gasayu.

                Asina yo,

                Arrastro al to delantre les ruines la mio vida pasada:

                Los amigos colos que yá nun salgo de parranda,

                Les botelles nel chigre hasta les tantes,

                El fumu del tabacu y la pasión del fútbol

                Les tardes del domingu;

                Too lo traigo hasta ti, a los tos pies lo dexo

                Pa que sepias que solo por ti cambié de vida,

                Y ehí lo poso n’ofrenda delantre del to altar:

                O, meyor, como’l gatu que lleva énte’ l so amu

                El zalegu del ratu qu’acaba de cazar

                Tres d’asistialu hores y más hores

    Por da-y gustu al so dueñu...

               

                ¿El ratu qu’acaba de cazar…?
                ¡Infortunada imaxen! 

                ¡Sí d’ello se trataba, d’echá-y mano

                Y, poles señes,

                Esti nun va enseñar siquier el so focicu!