Pela mañana, a les 12,30. Enantes de subir al Muséu la Radio, en Suares, visita prestosísima y que recomiendo.
El sentimientu de patria o nación, l'asturianismu, nuna palabra fue, como tolos años, el motivu central del actu, con un breve repasu de la identidá asturiana y territorial dende enantes de Roma.
Valió tamién l'actu pa tener un recuerdu de tolos mineros asturianos, de les families mineres, y del so esfuerzu, ilusión y trabayu la lo llargo de dos sieglos, pero con un aniciu yá tempranu, allá nel Aramu prehestóricu, y el beneficiu del cobre por aquellos mineros de la prehestoria asturiana.
Esi reconocimientu del esfuerzu, del trabayu, de la ilusión (y tamién del dolor, n'ocasiones) de tantes persones asturianes (asturianes d'aniciu o veníes de fuera) nun se traduz -díxose- n'aplausu a la política errada pa Asturies que globalmente significó l'aprovechamientu de les estructures de la empresa pública franquista pa montar sobre elles un poder políticu, sindical y social que -masque la intención fuera bona- supuso andar un camín enquivocáu y dañible pal conxuntu d'Asturies, que nos llevó a la situación de güei.
Esa reconocencia de xeneraciones de mineros y de families lleva sigo la reconocencia de formes de vivir y de cultura que se concreten en productos como la especialización de la toná nes Cuenques y nos territorios mineros y en cancios tan maraviosos y emocionantes como'l de A La Pipiona, madre, a La Pipiona, porque me dan castañes, llechi y boroña.
Y, anque tanxencialmente, vieno a señalase cómo en cuantes s'acabaren les subvenciones de Caxastur, y dempués del tremendu erru políticu de la cabera güelga, PSOE y SOMA abandonaren Rodiezmu, dexando asina al probe Alfonso Guerra ensin l'entretenimientu de la so perfomance anual de "¡Trema, mundu, que d'esta vamos!".
Al final, dempués del cantu del Asturies..., púnxose una ofrenda floral nel Monumentu al Mineru, onde se celebró l'actu, en Santuyanu / San Julián.
No hay comentarios:
Publicar un comentario