Lleo na Nueva España de 10/03/09 la información de que, por fin, va facese na desembocadura d`El Nalón la pasarela que va xuntar les dos orielles y poblaciones, L`Arena y San Esteban. ¿Va facese agora? Ver veremos, que dixo`l ciegu.
Pa que lo sepian los llectores: los alcuerdos presupuestarios ente´l PAS y el gobiernu de Sergio Marqués durante tres años (gracies a los cualos apaecieren la mayoría les carreteres asturianes iguaes y creárense vente mil empleos en tres años) dotaron de partida presupuestaria un proyectu pa llantar ente les dos partes de l´Arena una pasarela móvil que permitiera xuntar les dos orielles, meyorando asina la vida social y aniciando un potente estímulu turísticu. Cuando`l PSOE y Areces llegaren al gobiernu nel 1999 la partida taba dotada y el proyectu técnicu redactáu. Una de les primeres medides que tomó`l nuevu gobiernu (socialista, por supuestu) fue dar marcha atrás al proyectu y deviar les perres pa otru sitiu.
Pero la cosa nun acabó equí. Pa les siguientes elecciones, el PSOE y el gobiernu Areces ficieren correr la voz de que, agora sí, diben poner en marcha`l proyectu nuevamente. Apaecieren maquetes -a don Vicente Alberto, el rapaz, présta-y tanto xugar con elles pa engañar a los ciudadanos colos xuguetinos- y salió l`alcalde de Muros presumiendo de que "agora sí, agora la cosa diba en serio, porque agora gobernaben los socialistes".
Y fue asina, como gobernaben (y siguen gobernando) los socialistes, dempués d`atropar los votos, tiráren-yos un par de trompetilles a los vecinos de la rodiada El Nalón y a los asturianos en xeneral.
Asina que, agora, otra vez, torna la publicidá de la pasarela. ¿Faráse? Polo menos, de momentu, vuelven repetir los pasos d`enantes, cola salida l`alcaldesa, Carmen Arango, tamién a dar el pregón públicu. ¡Ye tan riquina, tan prestosuca! ¡Y son tan bien mandaos! Dense cuenta lo que diz: "Ahora sí que es el momento de la pasarela, antes había otras prioridades". Esto ye: yá sabemos que vos engañamos munchos años, pero como sois tan buenos entenderéislo, prubinos.
¿Y agora?
Pero nun s`esmuelan, si vuelven engañalos, yá saldrá otru alcalde (si los vecinos siguen equivocándose al votar) dientro un tiempu pa xustificalo.
Y cuando se faiga, si ye que se fai, ¿a quién-y cobramos el llucru cesante dende 1999?
No hay comentarios:
Publicar un comentario