La sentencia de recién del Supremu anulando la llexislación sobre'l pasar de cursu con más de dos asignatures en Bachilleratu vien a demostrar (una vegada más) que'l Parlamentu español -y mui particularmente'l PSOE- llexislen coles témpores (que ye, según yá entienden los mios llectores, un eufemismu pa denomar aquello que Cervantes designaba con un eufemismu perifrásticu: "allí donde la espalda pierde su honroso nombre").
Ensin entrar nel fondu del asuntu, lo razonable o non de que na educación superior y non obligatoria se pueda pasar de cursu con un sacu de suspensos más espurríu que'l "eso" la Bernarda (y dexando a un llau, asinamesmo, la organizada desorganización organizativa que diba facer de los centros aquello que Pérez de Ayala nomaba -con otru eufemismu- "una casa de lenocinio de módico estipendio"), lo qu'afirma'l tribunal ye qu'esa llexislación psoecabrerana ye illegal porque va contra la LOE, la cuala diz esplícitamente que, nel Bachilleratu, nun se puede pasar de primeru a segundu con más de dos asignatures suspenses.
¡Ah, yá ta!, van decir ustedes. Ye que los socialistes llexislaren asina pa cha-yos una mano a los escolinos y la sociedá y llibralos de la LOE, que ye una llei facista y reaccionaria, fecha por Bush y Aznar nuna nueche d'alcohol y sexu nes Azores. Pues non, la LOE ye la llei "progresista" fecha pol PSOE y los sos compañeros de viaxe pa derogar y sustituir la LOCE, l'anterior llei d'educación, que yera del PP.
Conque yá lo ven: llexislen col..., coles témpores y escontra sigo.
Menos mal que, como dixo'l fenómenu que lleva equí la educación, don José Luis Iglesias Riopedre, la sentencia "no tiene importancia, porque aún no se había puesto en práctica lo legislado".
¿Entós pa qué llexislen estos fenómenos?
Yá-yos lo vo contar otru día.
No hay comentarios:
Publicar un comentario