Nun ye pa naide un secretu'l que l'arte asturianu (como denomara con intelixencia y razón Xovellanos al llamáu "prerrománicu"), esa antorcha de la humanidá y testimoniu del gran milagru del pequeñu estáu d'Asturies o Reinu asturianu, ta mal atendío poles autoridaes (des)gobernantes.
El discursu del PP al respective ye que los monumentos del arte asturianu nun s'atienden porque tán n'Uviéu y n'Uviéu gana siempre'l PP. Esi desdexamientu, pues, sería parte d'un procesu xeneral: el cercu a Uviéu.
Tán enquivocaos nel PP y dicen babayaes cuando dicen eso. En primer llugar, porque nun hai sólo xoyes del arte asturianu n'Uviéu, hailos en más partes d'Asturies y tán toos igual de poco curiaos. En segundu llugar porque nun ye la clave la ciudá carbayona nin los sos votantes. Si los monumentos del arte asturianu tienen un tratu roín ye por tres razones:
a) LA PRIMERA PORQUE SON ASTURIANOS, y ye sabío que'l PSOE (y en xeneral la izquierda asturiana) refuga tolo que sea asturiano, ye más, da-y ascu.
b) La segunda porque la mayoría d'esos monumentos son iglesies, y los que non, palacios de reis, los reis del Estáu asturianu.
c) La tercera, porque son cultura, con mayúscules, y del pasáu, colo que nun pueden poner a los sos amigos a entretenese nellos.
Agora bien, tengan por seguro que, de gobernar, el PP faría satamente lo mesmo, porque tamién ellos, como el PSOE, tarrecen tolo asturiano.
3 comentarios:
Mui d'alcuerdu con esti artículu, Xuan Xosé.
La zuna a tolo asturiano (cultural, histórico, etnolóxico, político, llingüístico, etc.) cala fondo nesta Asturies alienada. El casu del tratamientu dau dende esti poder al arte asturianu y a tolo que seya propio del Reinu d'Asturies o los ástures ye más que sangrín.
Sicasí, la igua nun ta n'enfotase tolos díes n'acusar a la xente de fato y masoquista por votalos. Hai que salir d'esi círculu yá. La igua entama por dar batalla pública y ofrece-yos alternativa política positiva. Pa ello, lo primero ye ser visible, (contra-)informar, facer ruíu na cai, participar na sociedá y non "autoarrequexase".
A ver si somos (vusté tamién) quien. Agüeyo, somorguiada nos sos escritos dende les últimes eleiciones, una murnia y una fonda tristura énte esta Asturies escaecida de sigo y echada a morrer. Cuido qu'esi sentimientu ye normal -por humanu- y qu'esi pesimismu ye síntoma d'intelixencia pa deteutar la realidá d'anguaño (depués de tolo caleyao). Pero d'él nun pue nacer l'enfotu que necesitamos pa valtiar esi procesu d'escaezu al que mos quieren afalar.
Pel momentu, esti blogue ye un signu positivu d'esa voluntá participativa: a siguir con él.
http://msrasturies.blogspot.com/
Un artículu perbuenu; el prerrománicu ye lo meyor que tenemos y que munches otres comunidaes autónomes daríen un gueyu de la cara por tenelu.
Tenemos munches coses; el arte de la nuesa monarquía, el idioma asturianu, una hestoria de leyenda.
Tenemos munches coses y toes elles tan nel puntu de mira de los que quieren tracamundialo too con tesis goticistes o romanizadores (Señores Besga Marroquín y Ochoa) a la par con los paracaidistes de la UAM.
¿Cuantes perres se gastaron en Veranes, un restu de 5ª categoría, mientras tan perdiéndose les pintures interiores de Lillo y otres iglesies y palacios?
Porqué esta progresía de pacotilla quita les estatues de Pachu y non quita la del genocida del Campu Valdés? ¿Porqué yos gustará tanto los Césares a la señora Mapi y a Tini tortilla?
Y esa paisana que ta de consellera y que diz que no y consta nada; pero nada de nada; ¿no sabe, no ve, no llee? ¿nun tien asesores?
Y llueu bien esi ministro y espeta que va facer un nueu museu.
¿pero que pensará que somos todos babayos y que tamos tovia chupando el deu? Otru museu mas el 652 si no me falla la tiesta; Otru museu mas pa meter a otru amiguín a chupar de la tetina.
Y na mas que sal cualquier piedra sea o no romana ya empiezen a glayar estos farsantes que tenemos equí una gran obra romana, ¡un coliseum! por equí un ¡anfiteatru por allá!.
Pero si ye que nun tienen sentíu del ridículo
Publicar un comentario