El pasáu día 13 di un recital poéticu d'una antoloxía la mio creación. Al empar, la cantante fadista María do Ceo.
Estos díes toi asoleyando los testos que lleí nel recital.
Va equí un poema de triba social. Pertenez a Poemes de Xixón (1981).
UN HOME COMIA PULGOS NUNA PAPELERA A LES
SEIS DE LA TARDE
Hai díes que a les seis de la tarde nu hai munchu que contar.
Nun hai españíos de bombes
nin ñeños atropellaos
nin obreros que se demoquen al cayer del andamiu.
Nin siquier les andarines se suiciden en ensame
perseguíes poles
antenes de la televisión.
Pero a les seis de la tarde d'un día cualuquiera
pue vese a un home
— curiosu y afatáu,
cola corbata puesta
como
ñiciu de tiempos que pasaren—
arrimase
a una papelera
y escargachar guetando
los pulgos de naranxa, los garitos de pan,
les
faraguyes d'una fartura pasteles.
Pero,
nidiamente,
son coses que nun salen nos papeles,
quiciavis porque nun taba ellí el periodista,
o pa qué esmolecer los lletores,
o cómo desplicar que les madres corríen a
buscar la reciella
con
llacuaes enllenes proteínes
y
la cuayada de moda pela tele,
y,
sobre tou, coles xustes vitamines
pa que nun acutrale la rapaza.
O
más cenciellamente,
quién
ye a desplicar,
sata,
correchamente,
l'alloramientu
d'un home de cultura,
de
bon raigañu y mena
— alviértese na mesma educancia cola que
escazobiella
y esmuerga darreu los pulgos o garitos—,
que
abaxa tan fondero
que
nun tien siquier la vergoña
d'esperar
a la nueche pa xintar.
Por eso,
hai
díes que a les seis de la tarde nun hai munchu que contar:
nin
siquier que un home comía nes papeleres,
calteniendo
perfinamente,
ye
verdá,
toles
buenes maneres de xintar;
si
acasu, col únicu defeutu
—y
alviértese nos güeyos, gachos, murnios—
de
nun da-i gracies al cielu pola ayalga.
Nota:
nel orixinal cuayá, envede cuayada. Per otru llau, alvertiránse dalgunes discrepancies cola ortografía actual.
No hay comentarios:
Publicar un comentario