El pasáu día 13 di un recital poéticu d'una antoloxía la mio creación. Al empar, la cantante fadista María do Ceo.
Estos díes toi asoleyando los testos que lleí nel recital.
Va equí un poema que tien como centru la ciudá d'Uviéu. Como se ve, tien un tonu un pintín humorísticu, estremáu del de mañana, Catedral. Pertenez a ...Y de llastientes picos (1999).
Tinguilín,
tinguilón.
La campana tien mayuelu,
pero la gordina non.
Siete la mañana. Suena
el reló na Escandalera.
Poco a poco va la xente
empobinando al trabayu:
crucia la plaza un rayu
de sol. Pía un gurrión
al calor. Chía tamién
a garllos verdes y roxos
el semáforu y pásalu
a golfaraes la xente.
D'un perezu, la ciudá
espurre un brazu hacia Sieru,
l'otru a Mieres, mientres tasca
los costazos contra Trubia.
Y na plaza, la gordina,
el carru y el barrenderu,
qu'escobia la nocherniega
basoria. Y tien mayuelu
la campana de la Caxa,
qu'avienta les campanaes
-hasta siete- pela plaza.
Siete tinglíos que son
como clares ventanielles
qu'abren la ciudá al sol.
La campana, tinguilín
Tien mayuelu,
tinguilón.
¿Pero la gordina?
¡Ai, hom!
No hay comentarios:
Publicar un comentario