El pasáu día 13 di un recital poéticu d'una antoloxía la mio creación. Al empar, la cantante fadista María do Ceo.
Estos díes toi asoleyando los testos que lleí nel recital.
Va equí un poema de triba social. Pertenez a Poemes de Xixón (1981).
AMANECER
NEL BARRIU NUEVU
A les ocho canciaben les persianes,
y un violín de tusíos 1'armonía
al runfar del motor entemecía
y al perezu reondu los portales. Ceguñaren rosaes les ventanes,
sascudiose l'acera l'aguadía,
y al calicor del despertar del día
bailló el gatu del sol enos cristales.
Blincó el martiellu,
rinchó la grúa,
llancó’l clavu,
bailló el calderu,
rinchó el morteru.
Arume de cafés y de tostades
del ladrillu y cementu arrecendía;
y en reblagos azules d'alegría
diba la voz prendiendo peles calles.
II
Dexaime ver les madres
carretando los fiyos a la escuela:
eses
cares tan llargues
que acostinen el mundiu na cartera;
esi
abrigu heredáu, esa llibreta
que fixera ya enantes tala xera.
Mirái
salir les cases
al
aire d'esa ñeña
que
afatara les ceyes y pestañes
güei
la vegá primera.
III
Va en sin afatu, tienra,
entá lleva los rulos,
y pingaya-i la bata
per embaxu l'abrigu.
Dexa-ila, tan tempranu,
que alderique na tienda;
que mierque los menudos,
y de pan una barra
que abellugue na cesta.
Que entrugue polos precios calculando pal
diariu.
Y pal día de fiesta.
¡Callái! Que lleva xera
facer la compra diaria, escobiar bien la
casa
y tresnar la puchera
pa cuandu torne l'home
y aporte la reciella.
IV
Son les diez. Torna el silenciu al
barriu.
Dalgunos coches pasen gatuñando
l'asfaltu,
y ye a sentir la oreya
fervollar el silenciu de la espera.
Relluma el sol nos charcos
asperando el correr de los rapazos.
Nos requexos pigacen
les ales de les gaites y tambores,
los turullos del mar, les barcaroles,
y tan a puntu d'esñalar en vuelu
les campanes rosaes de les nubes
y los raitanes verdes
que esparden camparines
pente les cases, pente'l barriu nuevu,
pente’l
silenciu mozu que suaña el barriu nuevu.
No hay comentarios:
Publicar un comentario