Ayer paseaba yo a les siete la tarde per El Llano, en Xixón, y abordóme un paisanu. Los intercambios de cortesíes y d'información, los de siempre. Yo nun m'alcordaba d'él y díxome que facía tiempu que quería abordame. Lo que quería decir ye qu'ente él y yo punximos la primer bandera d'Asturies qu'hubo en Cangues d'Onís.
Nun reaccioné bien más qu'a medies. Entrugué-y si lleera l'ensiertu del 5/09/16 d'esti blog sobre esa cuestión o si lo viera en facebook y díxome que non. Yera un petite que tenía él fai tiempu y que, cuando me viera otres vegaes, nun se decidiera a falame.
Yo reaccioné bien a medies. Entrugué-y pa marchar cómo se llamaba y diome nome y apellíos, pero tenía que sacá-y una semeya y nun se m'ocurrió.
Llámase Fernando y ye de Cabrales y, peles señes, ha ser esi que ta upáu a la mio manzorga poniendo la bandera.
Si ve esto o daquién lu ve, que por favor m'escriba al facebook. Quiero poner equí la so semeya, porque nun nos conocimos n'ocasión roína.
El 11 de payares de 1978 constituíase "solemnemente" el Consejo Regional d'Asturies en Cangues (d'Onís). Nin una sola bandera d'Asturies nel actu nin na cai. Nada más que la que yo coloqué, como manifiestu y protesta, cola gabita d'otra persona, nes verxes del Ayuntamientu.
No hay comentarios:
Publicar un comentario