...Y a los santos adoren pola peaná.
Esto del Papa Francisco ta siendo prestosísimo. Tien encantaos a tolos que nun van a misa y a tolos que nun creen (que son parte, tamién, de los que van a misa y de los que la dicen, fáganme casu).
Agora paez que la so mediación ente EEUU y Cuba fizo paulinar (esto ye, caer del caballu o, meyor, qu'el caballu lu baltase) al menor de los Castro, Raúl, que ta tentáu, vistu'l comportamientu'l Papa a volver a rezar y volver a la Ilesia.
«Estoy muy impresionado por la sabiduría y la humildad del Papa. Cuando Francisco venga a Cuba voy a asistir a todas sus misas».«Leo todos los discursos del Papa. Si sigue así, volveré a la Iglesia católica. Aunque soy miembro del partido comunista, que no admitía a los creyentes, pero se han dado pasos adelante».
Aparte otros comentarios que se m'ocurren y que nun vo decir, sí quiero sorrayar que don Raúl ta como los aldeanos del cantar asturianu.
La xente de l'aldea ta condená: / nun tien respetu al cura / y a los santos adoren / pola peaná.
Porque la Ilesia nun ye'l santu, nin la peana'l santu (el Papa Francisco), sinón, como de xuru, don Raúl sintiera cuando estudiara nos xesuites (pero nun sé si lo deprendiera), la Ilesia nun ye'l Papa, sinón la doctrina y les creencies de mena metafísica y tresmundana. Esto ye, anque los papes camuden la Ilesia nun camudó un res.
¿Por qué creer entós agora y non enantes?
No hay comentarios:
Publicar un comentario