Yá van cinco persones que me paren o que falen migu, persones a les que nun conocía o reconocía, y que se quexen de que nun nos presentemos a les autonómiques porque nun tienen a quién votar. Incluso dalguna d'elles decía que teníamos que presentanos incluso pa nun sacar nada.
Siéntolo por elles y por aquelles otres que lo vean igual. Do-yos les gracies pol so enfotu y presénto-yos, nel nome propiu y nel del PAS, disculpuques. "Disculpuques" na medía que nun ye "culpa" nuestra'l non presentanos, pero sí en cuantes "defraudamos" a los qu'esperaben la presencia del PAS n'elecciones.
Yá lo desplicó'l partíu en nota pública fai un mes, pero vuelvo sintetizar agora les razones:
1º Los tiempos son malos y raros. "Raros" porque nunca se viera que partíos que nun tienen dala representación, nin cadarma nin candidatos (como Podemos y Ciudadanos) o, tolo más, candidatos atropaos a última hora, ensin trayectoria nel partíu y ensin conocencia; partíos que nun tienen dala representación tengan el tratu de "partíos parlamentarios". Inxamás pasara eso. Durante tolos años de la nuestra existencia a nós medíennos satamente polo que teníamos, nin un minutu más na tele, nin na radio nin na prensa. Y agora, sorprendentemente, los que nun son nada nin municipal nin autonómicamente tienen el tratu de partíos parlamentarios.
Pero, fuera d'esos pocos qu'entraren pel güeyu derechu a los medios, nin freba pa los demás, como se ve. ¿En qué llugar nos diben allugar a nós en casu de tenemos presentao? Ensin dulda ninguna, como a los que nun-yos dan nin freba: en realidá, si lo camentamos bien, estes municipales y autonómiques nun son más qu'una primer vuelta de xenerales, y solo cuenta (o casi solo) Madrid y los mensaxes que d'ellí s'emiten.
2º Pa romper esa situación diba falta tener munches, munches perres, a fin de facer una campaña que pudiese romper esi silenciu, lo que nun tenemos nin de lloñe.
3º Esi puntu de vista de los medios coincide, además, col puntu de vista más espardíu de la opinión pública, que tien puesta, en xeneral, la mirada en Madrid y non n'Asturies, nos partíos centraliegos y non nos llariegos, acentuando asina una tendencia hestórica y mayoritaria de la sociedá asturiana.
4º Neses condiciones, paeció más oportuno nun sufrir un infortuniu que ficiese esboroñar el patrimoniu históricu y d'imaxen qu'entá atesora, camentamos, el PAS.
Sentímoslo. Gracies. Acasu como MacArthur, "tornaremos". Ehí seguimos. Amatagaos, pero seguimos.
Y éxitu pa los de Bimenes.
No hay comentarios:
Publicar un comentario